بسم الله الرحمن الرحيم..
بدااية..بما أن هذا أول موضوع لي في عطر الغرام الموقره أتمنى أن ينال ولو بالقليل من
استحسانكم...
انا انسانه ما احب المقدمات والحركات هذي ف بخش في الموضوع دايركت..
في بديااة طفوولتي كأي طفل ..دخلت للمدرسه..كاانت أسعد لحظاات حيااتي..
كنت اغااير بنت عمي لأني سجلت قبلها الموهم ..كنت استيقض كل يووم الساعه
5 الفجر كني خبّاز ماكأني طالبه في الصف الأول الابتدائي..
كنت اقووم والخشه مفقووقه منذا ليين ذا... تستقبلني امي فرحاانه اني اول وحده من اخواني
احب الدرااسه اروح والبس مريولي واجي عند امي عشاان تكد شعري..
تقعد تكدكد في شعري وانا اللي اغفي..ولاحسيت الا بشي بغى يطلع عيووني من مكانها..
شي فقع رااسي بأقوى شي .. وألتفت والقاها امي فلقتني بالفرشه
قالت لي: موب كل ماجيت اربط شوشتس دنقتي وانفكت..
المهم خلصت امي من كدكدة شعري وقاامت بتسوي فطور على شرفي..
بما انه اول يوم دراسي لي.. واجي للمطبخ والقاها مسوية لي كورن فليكس..
حسيت لحظتها اني ملكت الدنيا ومافيها..
الموهم ما امدااني آكله الا وانا كااااعته كل ابووه ...اثاري معدتي ماتعودت عليه..
ماتعودت الا على القرص والحليب
الموهم وآخذ طريق دربي وامشي طبعا مدرستنا حول بيتنا لذلك اروحلها مشي..
(حول بيتنا ترى يعني في الحاره موب اللي ورانا اللي وراها) ..
المهم وصلت للمدرسه ..صاادقت لي وحده يقالها مزنه..دخلت قلبي هالانسانه
استمرت الاياااام ..واستمرت علاقتي بمزنه..
وصرنا نروح انا وياه مشي في الصبح والظهر..وحنا معوودين لبيوتنا كاانت مزنه تقولي
داايم وحنا في نص الطريق ..فراوله..انتظريني هناا بروح دقايق وبرجع..
وكل مره انتظرها...ولا ادري وش قصتها ولا ادري وينهي تروح..
في يوم من الايام لحقتها..تاابعتها...شفتهامااخذه شي وتشربه...
انا قعدت افكر وافكر ..اقوول وش ذا اللي قاعده تشربه مزنه ولاتبيني اشوفها..
مرّت الاياام..ومرّت شهوور وانا اسأل نفسي كل يوم نفس ذاك السؤال..
وقررت اني اسأل مزنه عن ذا الشي اللي تشربه..
وحنا راجعين ذاك اليوم ..قالت لي فراوله انتظريني هنا..بروح دقايق وارجع..قلتلها
مزنه انا لحقتس ذااك اليوم وشفتس تدفعين فلوس وتاخذين شي تشربينه...وشو ذا الشي..
قاالت لي اسمعي انا بشتريه اليوم وذوقيه واذا اعجبتس نصير نشتريه انا وياتس كل يوم..
قلت مشينا...ونرووح انا ومزنه..وتدفع له مبلغ ويعطيها اياه..وتفتحه..وتقحن منه وتعطيني
وانا بين نارين مدري اشرب واجرب واصير مثل مزنه والا اعرف قدر نفسي واني طفرانه..
ولانيب قادره اجيب المبلغ ذا اللي تجيبه مزنه..
في لحظه من لحظات التهور ..قررت اني اجغم لي جغمه..واذوق طعمه...
في البداايه ما اعجبني بس يوم جغمت جغمه ثاانيه الا وحسيت بطعم شييييي
مادريت الا ويد كنها يد جاازورا خمطته من يدي..قاالت لي:هييييي انتي موب انا اللي ادفع
وانتي اللي تقحنين انا قلتلتس ذووقي ماقلتلتس لطيه كل ابووه جعلتس ماتحدرينه..
انا سكت... ماقدرت اهاوشها ولا اقولها شي ..عشان لاجا باجر تخليني اجغم من ذا
اللي معها
يووم جا من باجر وحنا في المدرسه..مااخليت شي ماسويته لها عشان ترضى علي وتخليني
اجغم لي جغمه..
وحنا رااجعين ابتساامتي البريئه شااقه وجهي شقّ..احتريها متى بتااخذ الماخوذ حقها
عشان تعطيني منه
يووم وصلنا للموقع ..قالتلي وين دراهمتس..
قلت والله مامعي ولاهلله..قالت:يعني وش السواة.. تنتظريني مثلا ادفع لتس..
قلت تكفييين طلبتس ياامزنه ..طلبتس ذا المره سلفيني..قالت:تخسين وتعقبين مابقى الاهي
بعد..
قلت طلبتس ذا المره وخلااص..من باجر بأطاالب اهلي انهم يعطوني مصرووف..
لا للمفرود وعصير لب لب لب لب...اللي يحرق معدتي...
قالت:خلاص دامتس من باجر بتجيبين مصوورف بعطيتس المبلغ اللي تبينه..
انا ماوسعتني الدنيا من الفرررحه..قمت احبحبها واحبحب جبهتها وراسها اللي كنه قرش
ورحنا وقحنا لييييين تفقعت بطوونا..
وضلينا على هالحااله شهوور وشهوور..ومرتن من المراير..غابت مزنه واضطريت اني اروح
للموقع لحالي..
واروح وادفع له مبلغ اكثر من المبلغ اللي داايم اعطيه..طبعا عشاان يرجع لي البااقي..
هو الظاهر درا اني لحالي وان مزنه ميب معي..قاام وخذ فلوسي كلها ولاعطااني شي..
انا قعدت انتظره يعطيني شي ماعطااني..
جااني انهياار عصبي.. لأن المبلغ اللي عطيته هذا مصرفي لمدة شهر كااامل..
قعدت ألعنه وأهاووشه واشووته وانافي قمة الانهياار.. وهوو في مكاانه ماحرّك سااكن..
تحسفت اني في يووم من الايام طاوعت مزنه..دريت انها ماتبيلي الخير..لعنتها في نفسي لييين
قلت بس ...ماعلمتني ان برّادة البيبسي ماتصرف لي الربع دينار وترجع لي الباقي..
والآن وانا ابلغ ربع قرن من الزمااان لا انسى حرقة قلبي على ذاك الربع
ما أساامح أهلي الى يووم القيامه انهم ماعلموني ذا الشي
وانا من هذا المنبر احث كل من قرأ هذا الموضوع انه يعلّم كل جاهل يعرفه بهذي النقطه
عشاان ماينحرق قلبه مثل ما انحرق قلبي..
مايستفااد من الموضوع..
ان فيه سؤال يراودني منذ اشهر الا وهو...هل برّادة البيبسي اذا دخلنا فيها الربع
بتطلعلنا بيبسي والا لا...ما ابيه ينحرق قلبي مرّه ثانيه وتصير البرّاده مديونه
لي بدينار
ختاااما..اتمنى انكم تتقبلون ثقالة دمي..لأني في بدااية مشواري الفني..
وان شاء الله اني لأجيب لكم موضوع ازين منه باذن الله

التوقيع:

•✿•ليًسِتِ مٍشُگلتِيً إنٍ لمٍ يًفٍهُمٍ آلبُعُضَ {..مٍآ أعُنٍيًهُ
وٍليًسِ بُآلضَرٍوٍرٍهُ مٍآ أكتبه..} يًعُگسِ حِيًآتِيً آلشُخٍصِيًهُ•✿•